خَجلان أقول إشفعلِنا
عصام
علم الدين
بسم الحريه
الكَدابه
جامع وَرا
جامع يِتدَك
بسم الحريه
الكدابه
بنخُش سجون
لمُجَرَد شَك
يتحَط قانون
يسمَح بالشِرك
ويُتاح ويَجوز
بَلاجات لعرايا
وحتىَ جَواز لشذوذ
وقانون بيعارِض
لِبس حِجاب
وبيربُط بين المُسلِم
والإرهاب
وبيجعَل مِن أَباليس
كُتاب
وأبو فِكر خَسيس
يِتحَوِل صَحفي في الدنمارك
***
بسم الحريه
الكدابه
وإسم حقوق الإنسان
الدُنيا إتقَلبِت
غابه
بقى ظُلم ف كُل مكان
بتموت الناس ملايين
وبيصبَح كُل كَلامنا حزين
بيدور الداير فيك ياعراق
وبيبنوا السور جوه فلسطين
***
بسم الحريه
الكدابه
أَعظَم مَخلوق
سَبوه
باللي ماهوش
فيه وَصَفُوه
***
شَيطان خيالهُم
حبر فاسِد مَدُهُم
مَلعون كَلامهُم
من حِقد مالي قَلبُهُم
سَكران قَلمهُم
في حروفُه ريحة
خَمرُهُم
خايب أملهُم
مَهمَن أساؤا بجَهلُهُم
هايحين أَجلهُم
والدود هايقرَف
مِنُهُم
هُمَ ومِثالهُم
بكرة مَزبَلِة التاريخ
هاتلمُهُم
***
وإنت هاتفضَل كُل وقت وكُل حين
خَير إنسان إتخَلَق
الصادِق الأمين
صاحِب أَعظَم خُلق
خِتام المُرسَلين
وإمامهُم كُلُهُم
أكملت لينا الدين
ومكارم الأخلاق
جيت لَجل تِتمُهُم
***
وإنت الحَبيب المُصطفىَ
وكفايه في صِفاتَك صِفه
بيها رَبي خَصَك وكَفىَ
إسمَك بإسمُه بيتوَصَل
ولا حَد لمقامَك وَصَل
ومَهمَن كان أو حَصل
فأنتَ هادي البَشر
والنور اللي إنتَشَر
والدين اللي إنتَصَر
على كُل مَن كَفر
***
تَبَت إيديهُم
فاكرين كلامهُم ليه أَثر
عِميِت عِنِيهُم
لا بَصيره
ولا بَصر
بنلوم عليهُم
وإحنا بسكوتنا وضَعفِنا
نِتساوا بيهُم
وعَظيم هايبقىَ
ذَنبنا
فياخَير خَلق ربِنا
خَجلان أقول إشفعلِنا
خجلان أقولها يارسول الله
ياأَحب شَخص لقلبِنا